عندما ينفجر الفلسطيني غضبا بالغل المكتوم وصية الشهيد جهاد باللهجة الفلسطينية

كتب الشهيد جهاد ابن مخيم الدهيشة امس الاول بدكش تبلش مقاومة يا زلمه و خسارة فيك كلمة زلمة يلي بتضل اتفاوض على دم أبناء شعبه ومشغول في إعلان دولة وهمية عمره ما بصير زلمة أما بالنسبة لأهلي بعرف إني عذبكتو وغلبتكو كتير بس

بتمنى انكو تسامحوني و ترضوا علي، بعرف إنه بعد ما استشهد ان شاء الله الجيش راح يعذبكم و يمكن يهد درانا بس شو بدي أسوي، بقدرش أشوف أبناء شعبي بنقتلوا وأضل ساكت، بقدرش أشوف الي بسويه الجيش في المرابطات في الأقصى وأضل ساكت، بقدرش أشوف المتستوطنين كل يوم بقتحموا المسجد الأقصى وأضل ساكت، عشان هيك لازم أسوي اشي صغير عشان الأقصى”

سلاماات يما .. سلامات يابا . . . انا طلبت الشهادة ونلتها انا بقدرش اوصفلكو شو كنت شايف وانا بحمي في مخيمي وداري من الاحتلال … يما تزعليش يابا اخوتي حبايبي هاي طريق كل فلسطيني حر شريف انا بأذن الله شفيع الكو .

يا شباب فلسطين يا شباب الدهيشة … فلسطين غالية والروح بترخصلها امشو ع طريقي ونهجي حتى التحرير .

ديرو بالكو ع المخيم ..
=========================

بعد سماع خبر استشهاد جهاد قالت ام الشهيد باللهجة الفلسطينية

يما؟احكيلي شو مالك ؟ سامحني يما عبيتلك بدلتك البيضة دموووع راح تسامحني صح يما! طيب ليش بتردش علي ؟وين صوتك يما؟ وأنا ع صدرك غمضت عني عشان أقعد معاك لحالنا وتحكيلي شو مذايقك يما؟ فتحت عنيك وبوستني ع راسي وضميتني زي دايمأ وحكيتلي: بدك تسافر لفترة طوويلة وبعدها بدك تودي وراي أجي عندك يما!! حكيت هالكلمتين وضحكتلي وبعدها نمت,ليش نمت يما ؟ليش؟ لسة بدري يما بدي أجوزك وأفرح فيك,جهااااااد قوووم يما ضل 5 أيام وبخلص هالشهر وبتوخذ راتبك… بتذكر حكيتلي:بدك تشتري فيه دخان وأواعي وتعطيني الباقي .. أنا شو بـــدي بالباقي مدام نووور عنيا راااااح؟؟ أخذوا يزفوك لدارك الجديدة تخافش يما اسكن فدارك وانتا مبسوووط ولاد_مخيمك مش راح يتركوا حقك ,اتفكرش باشي يمااا,واوعك تخاف من القبر ,راح أصير أجي أزورك وأجيبلك الخبز الي بخبزة بتذكر حكيتلي انك بتحبة… تخافش يما ا ماشي ‫‏جــــهــــاد‬ يما الناس بنادوني ام الشهيد, احكيلهم ميغيروش اسمي معنديش حدا من أخوتك اسمة شهيد!! خليهم ينادوني ‫#‏ ام_جهاد‬ ,أنا امك يما اسمك جهاد مش شهيد مش شهيد يماا !! ما اجمل رائحة الشهادة انها تفوح من أزقة المخيم ….لا تحزني يا ام الشهيد هو لم يعد لحضنك بعد اليوم لكنه في رعايه ربه ..”

2 ص

اظهر المزيد
زر الذهاب إلى الأعلى